Friday, June 22, 2018

Scottish Poetry XXII

Gude Nicht, and Joy Be Wi' Ye A'
by Carolina Oliphant


The best o' joys maun hae an end,
The best o' friends maun part, I trow;
The langest day will wear away,
And I maun bid fareweel to you.
The tear will tell when hearts are fu';
For words, gin they hae sense ava,
They're broken, faltering, and few;
Gude nicht, and joy be wi' you a'.

O we hae wandered far and wide,
O'er Scotia's lands o' firth and fell,
And mony a simple flower we've pu'd,
And twined it wi' the heather bell.
We've ranged the dingle and the dell,
The cot-house and the baron's ha';
Now we maun tak' a last farewell,
Gude nicht, and joy be wi' you a'.

My harp, fareweel, thy strains are past,
Of gleefu' mirth, and heartfelt wae;
The voice of song maun cease at last,
And minstrelsy itsel' decay.
But, oh! whare sorrow canna win,
Nor parting tears are shed ava,
May we meet neighbour, kith and kin,
And joy for aye be wi' us a'!

No comments:

Post a Comment

Please understand that this weblog runs on a third-party comment system, not on Blogger's comment system. If you have come by way of a mobile device and can see this message, you may have landed on the Blogger comment page, or the third party commenting system has not yet completely loaded; your comments will only be shown on this page and not on the page most people will see, and it is much more likely that your comment will be missed.