Tuesday, June 12, 2018

Scottish Poetry XII

Cuddle Doon
by Alexander Anderson


"The bairnies cuddle doon at nicht,
Wi' muckle faucht an' din;
O, try and sleep, ye waukrife rogues,
Your faither's comin' in.
They never heed a word I speak;
I try to gie a froon,
But aye I hap them up, an' cry,
"O, bairnies, cuddle doon."

Wee Jamie wi' the curly heid—
He aye sleeps next the wa',
Bangs up an' cries, "I want a piece"—
The rascal starts them a'.
I rin an' and fetch them pieces, drinks,
They stop awee the soun',
Then draw the blankets up an' cry,
"Noo, weanies, cuddle doon."

But ere five minutes gang, wee Rab
Cries oot, frae 'neath the claes,
"Mither, mak' Tam gie ower at ance,
He's kittlin' wi' his taes."
The mischiefs in that Tam for tricks,
He'd bother half the toon;
But aye I hap them up an' cry,
"O, bairnies, cuddle doon."

At length they hear their faither's fit,
An', as he steeks the door,
They turn their faces to the wa',
While Tam pretends to snore.
"Hae a' the weans been gude?" he asks,
As he pits aff his shoon.
"The bairnies, John, are in their beds,
An' lang since cuddled doon."

An' just afore we bed oorsel's,
We look at oor wee lambs;
Tam has his airm roun' wee Rab's neck,
An' Rab his airm roun' Tam's.
I lift wee Jamie up the bed,
An' as I straik each croon,
I whisper, till my heart fills up,
"O, bairnies, cuddle doon."

The bairnies cuddle doon at nicht
Wi' mirth that's dear to me;
But sune the big warl's cark an' care
Will quaten doon their glee.
Yet, come what will to ilka ane,
May He who sits aboon
Aye whisper, though their pows be bauld,
"O, bairnies, cuddle doon."

No comments:

Post a Comment

Please understand that this weblog runs on a third-party comment system, not on Blogger's comment system. If you have come by way of a mobile device and can see this message, you may have landed on the Blogger comment page, or the third party commenting system has not yet completely loaded; your comments will only be shown on this page and not on the page most people will see, and it is much more likely that your comment will be missed.